Dünyanın da kefi çağdır,
Dünyanın da üzü gülür,
Dünyanın yaxşı vaxtıdır,
Dünyanın sevən vaxtıdır.
Bu dünyanın içində də
Bizim vaxtımızdır, gözəl,
Sevən vaxtımızdır, gözəl,
Sevib-sevilən vaxtımız…
Yer üzünün eşiyində,
Bu gecənin keşiyində,
Ay-ulduzun beşiyində
Allah da sevgi bələyir,
“Su” deyib də sevgisini
Torpağın üstə çiləyir…
Torpağa bax! Gör, sevgilər
Budaq açır, yarpaq açır
Bitir bu torpağın üstdən,
Yetir bu torpağın üstdən
O yarpaq, torpaq sevgilər
Allaha sarı ucalır…
Dünyanın yarpaq sevgisi,
Dünyanın torpaq sevgisi
Yetdikcə Allaha sarı
Dünyanın qəmi azalır…
Ver əlini, qaragözlüm!
Çıxaq bu gecə seyrinə…
Vallah-vallah, qaragözlüm!
Bu gecə özgə gecədir,
Yer göyü sevən gecədir…
Bu dünyanın məhəbbəti
Allaha gedən gecədir…
Bu dünya day belə sevməz,
Allah göydən sevgi tökməz,
Torpaq da sevgi bitirməz,
Ver əlini, qaragözlüm!
Gəl, gözlətmə, ver əlini
Çıxaq bu gecə seyrinə
Dünyanın sevən vaxtıdır.
Ver əlini, qaragözlüm!
Gəl, gözlətmə, ver əlini!
Keçər ha…!Peşman olarsan
Bu dünya day belə sevməz
Bu gecə keçər beləcə
Keçər…bir də ələ gəlməz…
26 noyabr 2021
